• الرئيسية
• الأسرة والمجتمع

كتبت فاتن صلاح .....

من فضلك.. كلمتين اختفوا من قاموسنا
هو إحنا ليه بقينا نستتقل كلمة «من فضلك»؟
يعني لما أطلب منك حاجة، بدل ما أقولك: «لو سمحت، ممكن تساعدني؟» أقولك بمنتهى البساطة: «هات… اعمل… خلّص…»
وكأن اللي قدامي ده موظف عندي، أو واخد مرتب مني!
الغريب إن «من فضلك» مش كلمة صعبة، ومش هتخلينا أقل من غيرنا، بالعكس… دي كلمة صغيرة جدًا، لكن بتقول عن صاحبها كتير.
بتقول إنه عارف يعني إيه احترام.
وعارف إن اللي قدامه إنسان، له مشاعر وله كرامة، ومش مجرد شخص موجود علشان ينفذ له طلباته.
والأجمل إنك لما تقول لحد «من فضلك»، حتى لو هو هيعمل الحاجة دي في كل الأحوال، أنت كده بتخليه يعملها وهو مرتاح، مش وهو حاسس إنه مجبور.
وبعدين تعالوا نبص على بيوتنا…
كام مرة الأم تطلب من ابنها حاجة من غير «لو سمحت»؟
وكام مرة الابن يرد عليها: «حاضر»… بس بطريقة كأنها بتطلب منه حاجة مستحيلة؟
إحنا محتاجين نعلّم أولادنا إن الأدب مش بس إنك تسلّم وتبوس إيد الكبير.
الأدب كمان إنك تعرف إزاي تطلب، وإزاي ترفض، وإزاي تتكلم مع اللي قدامك من غير ما تجرحه.
وصدقوني…
الدنيا مش محتاجة مجهود كبير علشان تبقى أهدى وأجمل.
ممكن كلمة واحدة تغيّر شكل موقف كامل:
«من فضلك».
«لو سمحت».
«ممكن؟»
ثلاث كلمات بسيطين، لكن أحيانًا بيكونوا أرقى من ألف محاضرة عن الأخلاق.
خلونا نفتكر إن الذوق مش ضعف… والاحترام مش تنازل… والكلمة الحلوة عمرها ما كانت تقليل من صاحبها.
يمكن إحنا محتاجين نرجّع الكلمات دي تاني لبيوتنا وشوارعنا وشغلنا…
قبل ما نكتشف إننا بقينا نعرف نطلب كل حاجة…
إلا إننا نطلبها بأدب.