في هوجة يناير انت كشعب عملت إيه؟!
في هوجة يناير انت كشعب عملت إيه؟! انت روحت بنيت على أراضي زراعية و خدت أراضي وضع يد.. و بنيت دورين تلاته عافية كده.. و سرقت كهربا و مية و تعديت على حرم الطريق بالبناء المخالف.. انت كشعب عملت وقفات احتجاجية و مطالب فئوية.. و نهشت في خزينة الدولة و أرهقت اقتصادها و عملتها و احتياطها النقدي.. انت كشعب تاجرت في العملة و السلاح و احتكرت السلع و عطشت السوق.. انت كشعب استغليت إن الدولة مرهقة و مشغولة بتسوية أوضاعها في الخارج و صدها للمؤامرة.. و مكنش همك غير نفسك و مصلحتك و الكسب السريع الغير المشروع.. انت كشعب حرقت و خربت و دمرت و كمان كان ليك مطالب.. انت كشعب استقويت بالشارع و فردت عضلاتك ع الدولة و خليتها متاحة و سهلة لأعداء الخارج.. مفكرتش في يوم ازاي الدولة قدرت توفرلك مطالبك وقتها.. و ازاي قدرت في عز انكسارها إنها تحتويك و تقولك حاضر و نعم على مطالبك.. و ازاي قدرت توسطن نفسها ما بين الضرب اللي جايلها من الخارج و ما بين قسوتك عليها في الداخل.. متجيش دلوقتي تقولي غلاء معيشة و تقولي اصل مش وقته.. مانت اللي اتسببت في غلاء المعيشة و انهيار الاقتصاد و خليت الدولة تبدأ من الصفر و اجبرتها على اتخاذ قرارت صعبة علينا كلنا لأن مكنش ينفع غير كده.. مانت اللي جيبتها ع الجنت عشان قال إيه لا مؤاخذة الفساد و تلاتين سنة معرفش إيه .. طب مانت في سنتين تلاته أفسدت فساد اكتر من فساد تلاتين سنة.. يا راجل ده اللي نقول عليه طيب و غلبان و معملش حاجة ساعتها هتلاقيه مقتحم كارفور و مدغدغ ماكينات ATM.. اقولك إيه و لا إيه.. تعالى نحسبها ورقة و قلم و نشوف مين اللي غلطان في حق مين.. الدولة و لا الشعب؟! مين اللي جباية.. الحكومة و الشعب؟! لو انت بتقول على أي قرار مش وقته.. طب مانت عملت ثورة مكنش وقته!! اللي بيكتبلك الكلام ده.. قسما بالله شارب المر.. لكن شايفها صح و شايفها من الاول.. و عيني على اتسبب في خرابها و مش بتعامل معاها بالقطعة.. النهاردة الله عليكي يا مصر و ربنا يباركلك يا سيسي.. و بكرة انتوا عاوزين مننا إيه احنا جيبنا اخرنا.. ماشي هات اخرك و اخربها تاني!! محدش ليه جمايل عليها عشان يذلها و يفتحلها في القديم!! اعترض براحتك على أي قرار أو قانون مش عجبك.. بس بلاش تطلع الينايرجي اللي جواك و تتهكم و تتريق و تفش غلك في الدولة و في الراجل اللي بيتكلم معانا بكل أدب!! كتير جدا الدولة في عهد السيسي غيرت قرارات.. الدنيا مش هتطير يعني.. اهدي كده و خليك مؤدب و انت بيتنتقد الدولة اللي وقفت في وش نص الكوكب عشان اصلا يبقى عندك بيت و متترميش في خيمة ع الحدود..