مش كل حاجة تتقال
كتبت فاتن صلاح ...
إحنا بقينا في زمن غريب شوية…
كل حاجة لازم تتقال، وكل حاجة لازم تتصور، وكل حاجة لازم الناس تعرفها..مثلا
واحد رايح المستشفى… لازم نعرف.
واحدة اتخانقت مع جوزها… لازم نعرف الحكاية من أولها.
حد اشترى حاجة غالية… لازم نسأله: «بكام؟»
حد اتأخر في الجواز… لازم نسأله: «إنت مستني إيه؟»
طب يا جماعة… هو إحنا مالنا؟!
في فرق كبير بين إنك تكون شخص اجتماعي وبتحب الناس، وبين إنك تعتبر حياة الناس ملكية عامة.
مش معنى إن الشخص قدامك بيضحك إنه مبسوط.
ومش معنى إنه ساكت إنه زعلان.
ومش معنى إنه رفض يحكيلك إنه مخبي عليك حاجة.
أوقات كتير، أحسن سؤال ممكن تسأله هو:
«إنت كويس؟»
ولو قالك «الحمد لله»… صدقه، ومتفتحش تحقيق!
مش كل فضول اسمه اهتمام، ومش كل سؤال اسمه محبة.
وفيه ناس بتقولك:
«أنا بس بسأل عشان بخاف عليك!»
وبعدها تلاقي الخبر لفّ على نص البلد!
الخصوصية مش قسوة…
والسكوت مش تكبر…
وإنك تعرف حدودك مش معناه إنك بعيد عن الناس.
بالعكس… ده معناه إنك بتحترمهم.
خلينا نتعلم إن مش كل باب مقفول لازم نخبط عليه، ومش كل حاجة اتقالت قدامنا لازم نعرف تفاصيلها.
لأن أحيانًا… أجمل سلوك ممكن نعمله هو إننا نعرف إمتى نسأل، وإمتى نسكت.
والقاعدة البسيطة اللي ياريت نمشي بيها:
«مش كل حاجة تخص غيرنا… تخصنا.»
والسلوك الحلو مش محتاج فلوس…
محتاج بس شوية ذوق واحترام الآخر
تحياتي