هدير بدور تكتب :مش معني ان حواليك ناس كتير انك مش لوحدك ؟!
الوحدة ملهاش علاقة ابدا بالناس اللي حواليك ، ممكن يبقي عندك مليون صاحب و اهل و عزوة بس وانت قاعد وسطهم حاسس بالوحدة ! الوحدة من المشاعر الإنسانية و نقدر نعتبرها غريبة عشان ملهاش سبب محدد بس بتبقي ديما حاسس انك عايز تقعد لوحدك و الانطواء و الانعزال بيبقي جواك حاجة مش عيزاك تعرف حد ولا تتعامل مع حد ولا تدخل في علاقات جديدة شعور و احساس بيخليك ان عايز تفضل لوحدك و بس و مش عارف تتعامل مع أي حد ولا اي شخص حواليك ! ممكن نقول أن من أسباب الوحدة الاكتئاب و الاكتئاب دا مرض نفسي و محتاج علاج مش مجرد شعور ولا احساس عادي لا الاكتئاب مرض نفسي و محتاج دكتور نفسي .
و برضوا من الأسباب الاضطرابات النفسية و الضغوط الاجتماعية يعني ممكن يبقي عليك ضغط من كل حاجة حواليك ف تدخل في اكتئاب و بعدين تحس بالوحدة ، و غيرها أسباب كتيييير جدا منقدرش نحددها .
لازم نقرب من اللي حوالينا و نعرف عنهم اكتر و لو حد فضفض و قاله ان عنده وحده داخلية لازم نقف جمبة و نساعده يتخطي دا حتي لو هيروح لدكتور نفسي الدكتور النفسي مش عيب ابداً نعتبره زي اي دكتور بنروحله شخص يساعدنا نتخطي مرحلة في حياتنا مش عارفين نتخطاها !
الوحدة كفيلة تؤدي الي الانتحار لو النفس ضعيفة و الموضوع زاد لازم نبقي موجودين في حياة بعض لازم نبقي جمب بعض ، لو حسيت او اكتشفت ان في حد اعرفه عنده احساس بالوحدة مثلاً أخده و ننزل نتفسح ، احاول ع قد ما اقدر اغير موده بالضحك و الهزار مثلاً ، نسافر وغيرها وغيرها طرق كتيرة عشان نشغله و ميبقاش لوحدة . فإن اسوء أنواع الوحدة اللي بتحس بيها وانت وسط ناسك و اهلك و صحابك.
