• الرئيسية
• الفن

أشعار: عمرو الأنصاري

---------------------------

لو كنت هكتب شعر يشفعلي
ف انا هكتب الآتي:
بيان عاجل
وغير آجل
بسرعة صرخة تحت القصف
ودمعة من صاروخ نازل على غزة
وهزة وخوف من المدفع
ورعب بيملك الرشاش
وطفل هناك يدوب مولود
وأمه ف ودنه بتكبر وبتقرر
تعيش راجل يا اما بلاش
حياتنا هي أقصانا
وغير الاقصى إيه يتعاش
وبعد القدس ليه تتعاش
متلزمناش حياة الذل
يغور الكل واحنا نكمل المشوار
قرارك لما تتجوز
لكن في الحرب ما في قرار
يا اما تعيش صلاح الدين
يا إما تموت عمر مختار
ياطفل بيبتديله نهار
فيفتح عينه عالأقصى وعالأحرار
في إسبوعه يجوز ميكونش فيه شخاليل
لكن بالطبع في قنابل وضرب النار
أغار عليك يا أقصى
ومن مثلي عليك يغار
عدوك بالسلاح مرعوب
وخايف م الحجر والطوب
وبيصرخ كيف النسوان
ولو شافك في وقت أدان
ينام في الارض على وشه
ذليل مقلوب
وانت بحجرك الشامخ
تقف وسط الكلاب صارخ
قم للحجر ووفه التبجيل
طموح الغجر من الفرات للنيل
وحيات آيات الله والذكر والترتيل
مانرضي بيكي بديل
احنا اللي كنا ومازلنا
في الأرض طير أبابيل
يشنو غارة نرمي الحجارة
يطيروا زي دخان سجارة
وإبن القدس مش هامه السلاح والنار
معاوية جاي من مكه على عكا
اريحا تفتح الأبواب
وفي نص الخليل مسجد يصلوا شباب
بتربطهم روابط دم
هناك بيت لحم سلام الله عيسى وعالأبرار
ومهما يستمرالقصف هتفضل غزة برضه عمار
وبيها الحر يتعافى وبكرا العودة يا يافا
وقلقيلية غذاء الروح وطولكرم الدوا لجروح
جنين ولادة مش بتهد وم الرملة الرجال هتشد
تخش اللد تزيحهم من طبريا وترفضهم بلاد الله
يا رام الله القليب بيحن
صغير السن شايل عزته ف ايده
حجر بينادي على شايله
أدان وفرض ترديده
بترمي الطوب عالمدفع
فيرجع لجل ما تعيده
ويتشرف بمس الايد
يكون العيد في وقت الرمي
حجر ضد الرصاص الحي
وعمره ف يوم ما خان رامي
ياحامي الأرض يا حامي
سلامي لكل راجل حر
سلامي لأهلي في الضفة
وبكرة هتتقل الكفة
وترجح في اليوم الموعود
مسير الأقصى لينا يعود
وبعد النصر لينا سجود
نقول النصر ما استعصى
بيان عاجل من الأقصى