رهان خسران
بقلم يامنة اليمني
وبحاول أفك طلاسم الحرف العاشق
فى عيون بتكحّل جفن الشوق
بمراود من خشب الأوهام
وبحاول انى اقطف ورده من زهر ربيع العمر
واتارينا فى شهر(بشنس)
والعمر خريف
لسّانا بنسلم للتخاريف
ونطير بجناح العشق لفوق
زى العصافير
لسّانا بنرفض نهبط يوم
على شجر الدوح
ونشوف الحظ فـ دنيتنا
دى كتاب مفتوح
مكتوب لنا من بين الألواح
البخت اهو مال
والقلب ده جف
جبنا العرّاف يفتح مندل
يقرأ لنا الكف
فتح المندل وقرأ لنا الكف
من غير ما يبوح
خايف أسأل عن سر الصمت
لتّضيع الروح... ده القلب عزيز
فـ لقينا دموعه نازلة بتغسل أرض التعاويذ
من قهرة قلبه على حالنا
شاور بإيديه لشجر الجميز
ولقيتها فجأه بتتكلم بلسان مقطوع
بتقول لى خلاص
غير دربك... شق طريقك
ده طريق الحب ماهوش مفتوح
ولقيت الحيرة واخدانى
وباسأل نفسى عن عنوانى...
أنا ساكن فين؟
وألاقى العين فجأه تغمّض
والحلم هناك.....
مستنى حبيبتى تدق الباب
واكلم نفسى واقول جايز جداً
عرّاف كداب
يعنى هيعرف كده علم الغيب من غير أسباب
ولقيتنى بافك طلاسم الحب الشفوى
واتمسّك انا بارض الأحلام
وباراهن نفسى مع العرّاف
على حب العمر
وباخاف ليكون ده رهان خسران
وارجع بالذُل وكسرة قلبى مع الأحزان
والظاهر قلبى خلاص أدمن طعم الخسران
أدمنت الحلم يضيع منى
ماهى دنيا غرورة.... ومالها أمان