• الرئيسية
• الأسرة والمجتمع

كتبت فاتن صلاح ....

فيه ناس كده… تدخل المكان تحس إن الدنيا كلها كانت مستنياها!
لازم صوتها يبقى أعلى صوت،
ورأيها هو الصح،
وكلامها هو اللي يمشي،
ولو حد خالفها… يبقى أكيد هو الغلطان!
يا حبيبي… بالراحة شوية..
إنت مش محور الكون
مش لازم كل الناس توافقك.
ومش لازم كل الناس تحبك.
ومش لازم كل كلمة تقولها الناس تصقف لها.
الاختلاف مش قلة أدب…
واللي يقولك «أنا بقول رأيي بصراحة» مش معنى كده إن من حقه يجرح الناس!
فيه فرق بين الصراحة وقلة الذوق.
فرق كبير جدًا!
يعني إيه واحد يقول لحد:
«إنت تخنت!»
«إنت شكلك وحش!»
«إنت كبرت!»
وبعدين يقولك: «أنا صريح ومبحبش أجامل!»
يا سيدي محدش طلب منك تجامل…
بس برضه محدش طلب منك تجرح!
خلي عندك شوية ذوق،
وشوية رحمة،
وشوية إحساس باللي قدامك.
وبعدين فيه مصيبة تانية…
ناس بتحب تقلل من غيرها عشان تحس إنها أحسن.
لو حد نجح: «ده محظوظ.»
لو حد اشترى حاجة: «أكيد جابها بقسط.»
لو حد اتكرم: «واسطة.»
لو حد شكله حلو: «أكيد عامل حاجة.»
طب ما تفرح لغيرك يا أخي!
نجاح غيرك مش بيخصم من رصيدك.
وصدقني… الإنسان الواثق من نفسه مش محتاج يقلل من حد.
خليك كبير بأخلاقك، مش بصوتك.
وخلي حضورك في حياة الناس إضافة… مش صداع!
وفي الآخر افتكر:
مش لازم تبقى أهم واحد في المكان…
يكفي إنك تكون أطيب واحد فيه.
لأن الناس ممكن تنسى كلامك،
وتنسى لبسك،
وتنسى شكلك…
لكن عمرها ما هتنسى إحساسك بيها.
وده هو السلوك اللي محتاجين نتعلمه
ونعلمه لأولادنا
تحياتي