أحلى ايام عمرنا
أسعد دايما بما يفكرني بأيام الزمن الجميل أيام الشباب واليوم كنت محظوظ بسماع صوت أخي وصديقي من أيام الزمن الجميل المهندس حسن طاهر
وقلت له احنا الجيل اللى بداية يومنا كانت 5 الصبح كان جيل بيبدأ يومه بصوت عبد الحليم حافظ وأم كلثوم فى الراديو و هى بتقول (يا صباح الخير فل ) وعبد الحليم كنت دايما اعدىمن طريق فيه قهوة..اسمع حليم واشوف حبيبتي وهيه رايحه المعهد..
و بننزل على المعهد الدينى ببني سويف و بنسمع فى الشوارع راديو العربيه .. برنامج (صاحبتك السلامه ) و كانت اغنيه التتر (بالسلامه يا حبيبى بالسلامه ) تقديم أيات الحمصانى . وكنا نعرف اننا اتأخرنا على طابور المعهد اول مانسمع برنامج (كلمتين وبس )للعظيم الراحل فؤاد المهندس ...
الجيل اللى كان بيستنى سينما الاطفال يوم الجمعه وبينبهر لما بيتفرج على ( جوله الكاميرا ) يوم الأحد مع هند أبو السعود وبيخشع قلبه مع برنامج ( العلم والإيمان ) للدكتور مصطفى محمود . الجيل اللى كان مصدق ماما نجوى إبراهيم لما بتزعل وتأنب بقلظ لما يغلط الجيل اللى كان كله لازم يشترى مسابقه بم بم، الجيل اللى انبهر بفوازير رمضان والف ليله وليله للراحل المخرج فهمى عبد الحميد هقول ايه ولا ايه بس على ااحلى ايام العمر، ياريت أى حد من جيلى يفكرنا ويفتكر معانا أحلى أيام عمرنا
بقلم محمد حلمي رئيس تحرير صحيفة وموقع النور نيوز