• الرئيسية
• الأسرة والمجتمع

كتبت فاتن صلاح...

إحنا بقينا مستعجلين على طول... مستعجلين نطلب، مستعجلين ناخد، مستعجلين نخلص، ومستعجلين كمان نزعق!
بس جرب كده قبل ما تطلب حاجة من حد تقول له: «من فضلك».
مش هتخسر حاجة والله!
«من فضلك هاتلي كوباية مية»
«من فضلك ممكن تساعدني؟»
«من فضلك ممكن تعدّي؟»
كلمتين صغيرين، لكن فيهم احترام كبير.
الغريبة إن كلمة «من فضلك» ساعات بنعتبرها ضعف أو مجاملة زيادة، مع إنها بالعكس تمامًا... دي بتقول للي قدامك: أنا شايفك، وحاسس إن ليك قيمة، ومش بعتبر إن من حقّي آمرَك وخلاص.
إحنا مش ناقصنا خناقات أكتر من اللي حوالينا.
يعني إيه لما واحدة تدخل محل وتقول للبائع: «هات كذا» من غير حتى صباح الخير؟
ولما حد يطلب خدمة من موظف وكأنه بيطلب منه حق مكتسب؟
ولما أب يقول لابنه: «هات، اعمل، روح، تعالى» من غير ما يعلمه أصلًا يعني إيه طلب باحترام؟
إحنا ساعات بنعلّم أولادنا الكلام الكبير... وننسى نعلّمهم الكلمات الصغيرة اللي بتخلّيهم ناس أحسن.
من فضلك... شكرًا... معلش... لو سمحت... آسف.
أربع كلمات يمكن شكلهم بسيط، لكن لو رجعوا تاني في كلامنا، يمكن حاجات كتير جدًا تتغير.
وأهو بدل ما كل واحد فينا داخل على التاني كأنه داخل معركة...
نفتكر إن اللي قدامنا إنسان زيّنا، عنده تعب، وعنده ظروف، وعنده كرامة.
فالمرة الجاية قبل ما تطلب حاجة...
ما تأمرش.
قولها ببساطة:
«من فضلك»...
يمكن الكلمتين دول يغيّروا طريقة استقبال طلبك...
ويمكن كمان يغيّروا يوم شخص كان محتاج كلمة حلوة.